ԳՈՐԾԱՐՔԸ ՀԱՍՏԱՏՎԵԼ Է. INTEL-Ը 7,68 ՄԼՐԴ ԴՈԼԱՐՈՎ ԳՆԵԼ Է MCAFEE-Ն

Միկրոչիպերի արտադրությամբ համաշխարհային առաջատար ամերիկյան Intel Corp.-ը ավարտին է հասցրել ծրագրային ապահովման արտադրության ոլորտում առաջատար McAfee ընկերության ակտիվների ձեռքբերման ուղղությամբ տարվող բանակցությունները: Ինչպես նշվում է Intel ընկերության տարածած պաշտոնական հաղորդագրության մեջ` գործարքի ընդհանուր արժեքը կկազմի 7,68 մլրդ դոլար: Հատկանշական է, որ McAfee ընկերությունը կշարունակի թողարկել և վաճառել իր ծրագրային ապահովման արտադրանքները սեփական բրենդով: Նախատեսվում է նաև, որ Intel և McAfee ընկերությունները շուկային կներկայացնեն իրենց համատեղ արտադրանքներն արդեն ընթացիկ տարում, ընդ որում ընկերությունների համատեղ գործունեությունն առավելապես ուղղված կլինի անհատական համակարգիչների ապահովության և պաշտպանության ծրագրերի մշակմանը:

«Գործելով որպես Intel-ի դուստր ընկերություն` McAfee-ն կընդգրկվի ընկերության բիզնեսի այն ուղղության մեջ, որը զբաղվում է ծրագրային ապահովմամբ և նմանատիպ այլ ծառայությունների մատուցմամբ (Software and Services Group)», -  նշվում է ամերիկյան ընկերության հաղորդագրության մեջ:

Հիշեցնենք, որ մինչ այս, 2010 թվականի դեկտեմբերին, Եվրահանձնաժողովը չէր բացառել գործարքի կասեցումը` ենթադրելով, որ այս գործարքը կարող է խախտել հակամենաշնորհային օրենսդրությունը: Հետագայում, սակայն, Intel  ընկերության փաստարկներն ապացուցեցին գործաքի «արդարությունը»:

McAfee-ին (կենտրոնական գրասենյակը` Սանտա-Կլարա, ԱՄՆ) տեղեկատվական անվտանգության ապահովման ոլորտի համաշխարհային առաջատար ընկերություն է, որը  հիմնադրվել է 1987 թվականին: McAfee-ին ներկայացնում է անվտանգության ժամանակակից և նորարարական ծրագրային լուծումներ, սարքավորումներ և ծառայություններ որոնք ամբողջ աշխարհում ապահովում են առևտրային, պետական և այլ կազակեպությունների համակարգչային համակարգերի և ցանցերի անվտանգությունը:

Բիզնես 24